Ferskvatnsvistgerðir eru kortlagðar út frá vatnafarsþekjum Veðurstofu Íslands (Vatnshlotavefsjá) og Loftmynda ehf. Stöðuvötn og straumvötn voru skjáhnituð í samræmi við vettvangsgögn og út frá nýjustu loftmyndum Loftmynda ehf. hverju sinni. Upplýsingar um kaldar lindir og jarðhitalæki eru fengnar frá öðrum rannsóknum. Vettvangsvinna fór fram 2012-2015 og úrvinnsla gagna var í samstarfi við Náttúrustofu Kópavogs.

Fjöruvistgerðir eru skjáhnitaðar í samræmi við vettvangsgögn og út frá nýjustu loftmyndum Loftmynda ehf. hverju sinni. Auk þess voru vistgerðir kortlagðar eftir ljósmyndum, útreiknaðri brimasemi, heimildum og ýmsum fræðigreinum. Vettvangsvinna fór fram 2012-2014.

Jarðhitavistgerðir eru skjáhnitaðar eftir loftmyndum Loftmynda ehf. og innrauðum SPOT gervitunglamyndum. Vettvangsvinna fór fram 2012-2013, auk þess sem notuð voru vettvangsgögn úr eldri rannsóknum NÍ, 2001-2002 og 2005-2008.

Nákvæmni gagna miðast við mælikvarða 1:25.000.

Fyrirvari um flokkun vistgerða

Náttúrufræðistofnun Íslands leggur með ritinu Vistgerðir á Íslandi fram tillögur að flokkun vistgerða sem á sér fyrirmynd í samræmdri og viðurkenndri flokkun vistgerða í Evrópu. Flokkunin byggir á rannsóknum víða um land með fyrirvara um að bæta mætti í þá þekkingu.

Náttúrufræðistofnun tekur við ábendingum um leiðréttingar á vistgerðakorti í gegnum netfangið ni@ni.is (Subject: Ábending um leiðréttingar á vistgerðakorti).